(សេអ៊ូល)៖ ក្រុមសមាជិកនៃគណបក្សប្រឆាំងនឹងលោកស្រីផាក គឺនហេ បាននិយាយនៅថ្ងៃសុក្រនេះថា ក្រុមអ្នកតំណាងរាស្ត្រយ៉ាងហោចណាស់ ៤០នាក់នៃគណបក្សកាន់អំណាចបច្ចុប្បន្ន Saenuri របស់ប្រធានាធិបតីកូរ៉េខាងត្បូងរូបនេះ បានយល់ព្រមជំរុញឱ្យមាននីតិវិធីទម្លាក់លោកស្រីពីមុខតំណែង ដោយសារតែរឿងអាស្រូវជាមួយស្ត្រី ឆយ ស៊ូនស៊ីល។ នេះបើតាមការចេញផ្សាយដោយទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃសុក្រ ទី២៥ ខែវិច្ឆិកា ឆ្នាំ២០១៦។

យោងតាមគណបក្ស Minjoo ជាបក្សប្រឆំាងដ៏ធំជាងនៅកូរ៉េខាងត្បូង ការជំរុញឱ្យមាននីតិវិធីទម្លាក់លោកស្រី ផាក ពីមុខតំណែងនឹងត្រូវធ្វើឡើងនៅដើមខែធ្នូខាងមុខនេះ ស្របពេលដែលគណបក្សប្រឆាំងមួយនេះត្រូវការសំឡេងគាំទ្រជាចាំបាច់យ៉ាងតិចណាស់ ២០០សំឡេងក្នុងចំណោមកៅអីសភាសរុប ៣០០ អសនៈដើម្បីសម្រេចវត្ថុបំណង ចោទប្រកាន់ និងទម្លាក់លោកស្រី ផាក ពីតំណែងប្រធានាធិបតី។

គួរបញ្ជាក់ថាដោយសារតែរឿងអាស្រូវនៃស្ត្រី ឆយ ស៊ូលស៊ីល បានធ្វើឱ្យប្រជាប្រិយភាពលោកស្រី ផាក និងគណបក្សរបស់លោកស្រីបាត់បង់យ៉ាងខ្លាំង នៅក្នុងចំណោមប្រជាជនកូរ៉េខាងត្បូង។ ជាក់ស្ដែងបើតាម ការស្ទង់មតិចេញផ្សាយដោយស្ថាប័ន Gallup Korea នៅថ្ងៃសុក្រនេះ ប្រជាប្រិយភាពលោកស្រីផាក បានដាំក្បាលធ្លាក់ចុះ ៤ភាគរយបន្ថែមទៀត ក្រោយការស្ទង់មតិកាលពី សប្ដាហ៍មុនបង្ហាញថា ប្រជាជនកូរ៉េខាងត្បូង ៩៣ភាគរយចង់ឱ្យលោក ស្រី ចុះចេញពីតំណែង៕

ប្រភព៖ freshnewsasia