Khmer Sthapana Online, Top stories in cambodia

នយោបាយ

ចែករំលែក

ដោយ៖ ស្ថាបនា

26/07/2010

ភ្នំពេញ

កាំង ហ្គេក អ៊ាវ ហៅឌុច ត្រូវជាប់គុក៣៥ឆ្នាំដោយគិតពីថ្ងៃចាប់ខ្លួន

ថ្ងៃនេះ អង្គជំនុំជម្រះសាលាដំបូង នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សូមប្រកាសថា កាំង ហ្គេកអ៊ាវ ហៅឌុច មានពិរុទ្ធភាពពីបទឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ ឆ្នាំ១៩៤៩ និងត្រូវបានផ្តន្ធាទោសដាក់ពន្ធនាគាររ យៈពេល ៣៥ឆ្នាំ។

កំាង ហ្គេកអ៊ាវ គឺជាបុគ្គលទីមួយ ដែលត្រូវបានយកមកជំនុំជម្រះនៅចំពោះមុខ (អ.វ.ត.ក)។ កាំង ហ្គេកអ៊ាវ ធ្លាប់បានបំពេញការងារជាអនុប្រធាន និងក្រោយមកជាប្រធានមន្ទីរស២១ ដែលជាមន្ទីរសន្តិសុខ មានភារកិច្ចក្នុងការសួរចម្លើយ និងសម្លាប់បុគ្គលទាំងឡាយដែលបក្សកម្មុយនីស្តកម្ពុជាយល់ថា ជាខ្មាំងរបស់កម្ពុជាប្រជាធិបតេយ្យ។ មន្ទីរស២១ បានដំណើរការពីឆ្នាំ១៩៧៥ ដល់ឆ្នាំ១៩៧៩ ។ អង្គជំនុំជម្រះរកឃើញថា ជនគ្រប់រូប ដែលត្រូវបានឃុំខ្លួននៅមន្ទីរស២១ សុទ្ធតែរង់ចាំការសម្លាប់ចោលទាំងអស់ អនុលោមទៅតាមគោលនយោបាយរបស់បក្សកុម្មុយនីស្តកម្ពុជាក្នុងការ "កម្ទេច" ខ្មាំង។ អ្នកជាប់ឃុំត្រូវបានសម្លាប់ដោយផ្ទាល់ក្នុងទ្រង់ទ្រាយធំ ឬបានសម្លាប់ដោយសារតែការធ្វើទារុណកម្ម និងលក្ខខណ្ឌនៃការឃុំខ្លួន។ ទោះបីជាអង្គជំនុំជម្រះរកឃើញថា មានមនុស្សចំនួនតែ ១២.២៧២នាក់ ត្រូវបានឃុំខ្លួន និងសម្លាប់ចោលនៅមន្ទីរស២១ ដោយផ្អែកតាមបញ្ជីអ្នកទោសក៏ដោយ ក៏អង្គជំនុំជម្រះបានបង្ហាញរួចហើយថា ចំនួនពិតប្រាកដនៃអ្នកជាប់ឃុំទាំងអស់ ពិតជាមានចំនួនច្រើនជាងនេះឆ្ងាយណាស់។

អង្គជំនុំជម្រះសាលាដំបូងរកឃើញថា កាំង ហ្គេកអ៊ាវ បានធ្វើការជាមួយអ្នកផ្សេងៗទៀត រួមទាំងអ្នកនៅក្រោមឱវាទរបស់គាត់ នៅក្នុងកិច្ចប្រតិបត្តិការមន្ទីរស២១ និងស២៤នេះ ។ ស២៤ ជាមន្ទីរចំណុះមួយ ដែលត្រូវបានឃុំខ្លួននៅទីនោះ។ អង្គជំនុំជម្រះរកឃើញទៀតថា កាំង ហ្គេកអ៊ាវ ពិតជាមានអំណាចពេញលេញ និងបានអនុវត្តអំណាចនេះនៅមន្ទីរស២១ ហើយអំពើរបស់គាត់ក្នុងការអនុវត្តនេះ បានបង្ហាញឲ្យឃើញនូវកម្រិតប្រសិទ្ធភាពចំពោះការងារ និងការពេញចិត្ត របស់គាត់ចំពោះភារកិច្ចនេះ។ គាត់បានបំពេញការងារដោយមិនខ្លាចនឿយហត់ ដើម្បីធានាឲ្យមន្ទីរស២១ ដំណើរការប្រកបដោយប្រសិទ្ធភាពខ្ពស់ ហើយគាត់ធ្វើដូច្នេះ ដើម្បីបង្ហាញភក្តីភាពដ៏មោះមុតរបស់គាត់ចំពោះថ្នាក់លើ។ ដូច្នេះ អង្គជំនុំជម្រះរកឃើញថា កាំង ហ្គេកអ៊ាវ ហៅឌុច មិនត្រឹមតែបានអនុវត្តគោលនយោបាយប៉ុណ្ណោះទេ ប៉ុន្តែគាត់ថែមទាំងបានចូលរួមយ៉ាងសកម្មក្នុងការបង្កើតគោលនយោបាយទាំងឡាយ របស់បក្សកុម្មុយនីស្តកម្ពុជា នៅមន្ទីរស២១ ទៀតផង។

        កាំង ហ្គេកអ៊ាវ ត្រូវបានចោទប្រកាន់បន្ថែម ពីបទឧក្រិដ្ឋកម្មក្រោមច្បាប់ជាតិ រួមមានបទមនុស្សឃាតគិតទុកជាមុន និងបទទារុណកម្ម ដែលអាចផ្តន្ធាទោសបាននៅចំពោះមុខ អ.វ.ត.ក តាមមាត្រា៣ថ្មី នៃច្បាប់ អ.វ.ត.ក ។ នៅក្នុងសេចក្តីសម្រេចដាច់ដោយឡែកពីគ្នា ដែលត្រូវចេញនៅថ្ងៃនេះដែរ ចៅក្រមនៃអង្គជំនុំជម្រះ មានការយល់ឃើញផ្ទុយគ្នា អំពីថាតើការទទួលខុសត្រូវចំពោះបទឧក្រិដ្ឋទាំងនេះ ត្រូវបានផុតរលត់ ឬមិនទាន់ផុតរលត់ នៅមុនការចាប់ផ្តើមការស៊ើបអង្កេតរបស់ អ.វ.ត.ក លើជនជាប់ចោទ។ ការមិនមានសំឡេងភាគច្រើនដាច់ខាតនៃចៅក្រមបួនរូបយ៉ាងតិច គាំទ្រចំពោះបញ្ហានេះ បានបង្កើតជាឧបសគ្គក្នុងការអនុវត្តយុត្តាធិការរបស់អង្គជំនុំជម្រះ ចំពោះបទឧក្រិដ្ឋជាតិទាំងនេះ។ ទោះជាយ៉ាងណាក្តី សេចក្តីសម្រេចនេះ ពុំមានផលប៉ះពាល់ដល់ការកំណត់ទោសទេ។

        កាំង ហ្គេចអ៊ាវ ត្រូវបានជាប់ពិរុទ្ធ ពីបទឧក្រិដ្ឋកម្មប្រឆាំងនឹងមនុស្សជាតិ ដែលមានបទល្មើសការធ្វើទុក្ខបុកម្នេញ ដែលរួមបញ្ចូលនូវបទល្មើសដទែទៀត នៃបទឧក្រិដ្ឋកម្មប្រឆាំងនឹងមនុស្សជាតិ មានដូចជា ការសម្លាប់រង្គាល ការដាក់ក្នុងមន្ទីរឃុំឃាំង និងការធ្វើទារុណកម្ម ព្រមទាំងជាមូលដ្ឋានឲ្យអង្គជំនុំជម្រះសម្រេចកំណត់ទោសសរុបរួម ដាក់ពន្ធនាគារចំនួន ៣៥ឆ្នាំ។ នៅក្នុងការសម្រេចកំណត់ទោសនេះឲ្យបានសមស្រប ដែលត្រូវបានប្រព្រឹត្តក្នុងរយៈពេលយ៉ាងយូរ មកលើជនរងគ្រោះយ៉ាងតិចបំផុត ក៏មានចំនួន ១២.២៧២នាក់ដែរ។

    អង្គជំនុំជម្រះក៏បានសម្រេចដែរថា មានកត្តាសម្រាលទោសមួយចំនួន ដែលតម្រូវឲ្យមានការផ្តន្ទាទោសដាក់ពន្ធនាគារជនជាប់ចោទមានកំណត់ឆ្នាំ ជាជាងដាក់ពន្ធនាគារអស់មួយជីវិត។ ស្ថានសម្រាលទោសចំពោះនេះរួមមាន កិច្ចសហការរបស់ជនជាប់ចោទ ជាមួយអង្គជំនុំជម្រះ ការទទួលសារភាពអំពីការទទួលខុសត្រូវរបស់ខ្លួន ការសម្តែងនូវវិប្បសារី ទោះបីជាមិនបានទូលំទូលាយក៏ដោយ ស្ថានភាពបង្ខិតបង្ខំក្នុងសម័យប្រជាធិបតេយ្យ និងលទ្ធភាពដែលថា ជនជាប់ចោទអាចនឹងស្តារនីតិសម្បទាបានឡើងវិញ។

        ផ្អែកតាមសេចក្តីសម្រេចកាលពីលើកមុនចុះថ្ងៃទី១៥ ខែមិថុនា ឆ្នាំ២០០៩ អង្គជំនុំជម្រះ បានសម្រេចថា ការកាត់បន្ថយទោសពីរយៈពេលផ្តន្ធាទោសខាងលើចំនួន ០៥ឆ្នាំ គឺជាការកាត់បន្ថយសមស្រប ដោយសារតែការរំលោភលើសិទ្ធិរបស់ជនជាប់ចោទ ក្នុងអំឡុងពេលឃុំខ្លួនគាត់ខុសនីតិវិធីច្បាប់ ដោយតុលាការយោធាកម្ពុជា ចាប់ពីថ្ងៃទី១០ ខែឧសភា ឆ្នាំ១៩៩៩ រហូតដល់ថ្ងៃទី៣០ ខែកក្កដា ឆ្នាំ២០០៧។ កាំង ហ្គេចអ៊ាវ ត្រូវទទួលបានការទូទាត់នូវរយៈពេលឃុំខ្លួននៅក្រោមសមត្ថកិច្ចរបស់តុលាការយោធាកម្ពុជា និងក្រោមសមត្ថកិច្ច អ.វ.ត.ក ។

        នៅក្នុងសាលក្រមរបស់ខ្លួន អង្គជំនុំជម្រះបានប្រកាសថា ដើមបណ្តឹងរដ្ឋប្បវេណីទាំង ៦៦នាក់ ពិតជាមានភស្តុតាងបញ្ជាក់លើការអះអាងរបស់ពួកគេថា ជាជនរងគ្រោះផ្ទាល់នៃមន្ទីរស២១ ឬស២៤ ឬមានភស្តុតាងបញ្ជាក់អំពីអត្ថិភាពជាជនរងគ្រោះផ្ទាល់នៃមន្ទីរស២១ ឬស២៤ និងសាច់ញាតិជិតស្និទ្ធ ឬចំណងនៃសេចក្តីស្រលាញ់ពិសេសជាមួយនឹងជនរងគ្រោះទាំងនោះ ឬភាពស្ថិតនៅក្នុងបន្ទុករបស់ជនរងគ្រោះទាំងនោះ ។ ដើមបណ្តឹងរដ្ឋប្បវេណីទាំងនេះ ក៏បានបង្ហាញថា មរណភាពរបស់ជនរងគ្រោះទាំងនោះ ធ្វើឲ្យពួកគេទទួលរងព្យសនកម្មជាច្រើន ហើយព្យសនកម្មទាំងនេះ គឺជាផលវិបាកផ្ទាល់ពីអំពើឧក្រិដ្ឋរបស់ កាំង ហ្គេកអ៊ាវ។ អង្គជំនុំជម្រះយល់ព្រមតាមសំណើររបស់ដើមបណ្តឹងរដ្ឋប្បវេណី ដែលបានស្នើសុំឲ្យបញ្ចូលឈ្មោះរបស់ពួកគាត់ក្នុងសាលក្រម។ អង្គជំនុំជម្រះក៏បាននិយាយក្នុងអំឡុងពេលសវនាការ។ អង្គជំនុំជម្រះបានបដិសេធសំណើរសុំផ្សេងៗទៀតទាំងអស់របស់ដើមបណ្តឹងរដ្ឋប្បវេណី ដោយហេតុថា សំណើរសុំទាំងនោះមិនមានភាពជាក់លាក់ ឬហួសពីវិសាលភាពដែល អ.វ.ត.ក អាចសម្រេចបាន។

        ការជំនុំជម្រះលើអង្គសេចក្តីចំពោះ កាំង ហ្គេកអ៊ាវ បានចាប់ផ្តើមនៅថ្ងៃទី៣០ ខែមីនា ឆ្នាំ២០០៩។ សេចក្តីសន្និដ្ឋានបញ្ចប់ការពិភាក្សាដេញដោល ត្រូវបានបញ្ចប់នៅថ្ងៃទី២៧ ខែវិច្ឆិកា ឆ្នាំ២០០៩ បន្ទាប់ពីមានការបើកសវនាការជំនុំជម្រះអស់រយៈពេល ៧៧ថ្ងៃរួចមក។ ក្នុងអំឡុងពេលធ្វើសវនាការទាំងនេះ មានសាក្សីចំនួន ២៤នាក់ ដើមបណ្តឹងរដ្ឋប្បវេណីចំនួន ២២នាក់ និងសាក្សីជំនាញចំនួន ៩នាក់ បានចូលរួមផ្តល់សក្ខីកម្ម។ មានប្រជាពលរដ្ឋជាង ២៨០០០នាក់ បានមកចូលរួមតាមដានកិច្ចដំណើរការនីតិវិធីនេះ នៅក្នុងសាលសវនាការសាធារណៈដោយផ្ទាល់៕

ទិដ្ឋភាពទូទៅនៅក្នុងមន្ទីរស២១(គុកទួលស្លែង)