គ្រឹះស្ថានបោះពុម្ភ និង ចែកចាយផ្សាយរបស់ក្រសួងអប់រំយុវជន និង កីឡាបានបោះពុម្ភ និង​ចែក ផ្សាយសៀវភៅសិក្សាគោលថ្មីម្តងមួយកម្រិតៗ នៅថ្នាក់មធ្យមសិក្សា ។ ដោយឡែកសៀវភៅភាសា ខ្មែរថ្នាក់ទី ៧ និង សៀវភៅសិក្សាសង្គមថ្នាក់ទី ៧ ដែលទើបចែកជូនតាមគ្រឹះស្ថានមធ្យមសិក្សា កាលពីពេលថ្មីៗត្រូវអ្នកស្រាវ ជ្រាវ និង គ្រូបង្រៀនមួយចំនួនអបអរផង ព្រួយបារម្ភផង និង រិះគន់ផង ។

លោកគ្រូ អ្នកគ្រូ នៅវិទ្យាល័យសន្ធរម៉ុកនិយាយថា សៀវភៅដែលក្រសួងអប់រំយុវជន និង កីឡា ទើបបោះពុម្ព និង ចែកចាយថ្មីឃើញថា បានបញ្ចូលនូវ ដំណឹងព័ត៌មានចំណេះដឹងថ្មីៗដែលវិវត្តតាម សម័យកាលហើយបានបញ្ចូលពុទ្ធិវិទ្យាសាស្រ្តពិសេសការលើកស្ទួយដល់សីលធម៌ និង ការថែរក្សា បរិស្ថាននៅតំបន់ដែលខ្លួនរស់នៅព្រមទាំងពិភពលោកទាំងមូលថែមទៀត ។

ប៉ុន្តែពួកគាត់មួយចំនួនព្រួយបារម្ភថា សៀវភៅភាសាខ្មែរថ្នាក់ទី ៧ ក៏ដូចជាសៀវភៅសិក្សា សង្គម រូបវិទ្យា គីមី ថ្នាក់ទី ៧ ត្រូវបានគេយកមេរៀនភាគច្រើនថ្នាក់ទី ៩ មកបញ្ចូលដែលអាច ធ្វើឲ្យសិស្ស ថ្នាក់៧ ពិបាកចាប់បានព្រោះជាចំណេះដឹងខ្ពស់ៗពេក ។

ដោយឡែកគ្រូបង្រៀននៅវិទ្យាល័យជម្ពូវ័នវិញបាននិយាយថា បើចែកសៀវភៅសិស្ស ហើយគួរ តែចែកសៀវភៅគ្រូផង ដើម្បីគ្រូអាចធ្វើកិច្ចតែងការបង្រៀនឲ្យទាន់ ពេលវេលាហើយ ចម្លើយសំណួរ មេរៀននានាមានការឯកភាពគ្នាជាធ្លុងមួយកុំឲ្យមានទំនាស់នៅក្នុងការឆ្លើយសំណួរក៏ដូចជាមិនស៊ី ចង្វាក់គ្នានៅក្នុងជួរសិស្ស ។

ចំណែកឯលោកគ្រូ អ្នកគ្រូនៅវិទ្យាល័យហ៊ុន សែន បូរី១០០ ខ្នងវិញបាននិយាយថា អក្សរសាស្រ្ត  ជាអត្តសញ្ញាណជាតិខ្មែរ អក្សរ នៅក្នុងសៀវភៅភាសាខ្មែរថ្នាក់ទី ៧ មានការកែប្រែ មួយចំនួនតាមវចនានុក្រមខ្មែររបស់សម្តេចព្រះសង្ឃរាជជួន ណាត ហើយតែនៅមួយចំនួនទៀត មិនទាន់បានកែទេ ។ ការធ្វើបែបនេះនាំឲ្យមានទំនាស់កើតឡើង ឬ ការមិនចុះសម្រុងគ្នានៅក្នុងការ ប្រើប្រាស់អក្សរ ខ្មែរ នាំឲ្យមានវិបត្តិកើតឡើង ។

លោកគ្រូ អ្នកគ្រូ លើកឡើងថា កាលណាអក្សរវិបត្តិនាំឲ្យជាតិមានវិបត្តិដែរ ដូចកំណាព្យស្តីពី អក្សរខ្មែររបស់សម្តេច សង្ឃរាជជួនណាត អក្សរវិបត្តិជាតិវិបត្តិ ។ ពួកគាត់សំណូមពរឲ្យគ្រឹះស្ថាន បោះពុម្ពផ្សាយជួយកែតម្រូវឡើងវិញផង ឲ្យស្របតាមសារាចរណែនាំនាឆ្នាំ ២០០៦ ។

រហូតមកដល់ថ្ងៃទី ៣ កុម្ភៈ ឆ្នាំ២០១០ នេះ ខ្មែរស្ថាបនា ព្យាយាមសុំការពន្យល់ពីមន្ត្រីពាក់ព័ន្ធ ដែរតែមិនអាចទាក់ទងបាន ៕​