សាក្សីនៅកន្លែងកើតហេតុបាននិយាយថា កាលពីព្រឹកថ្ងៃទី២៧ ខែសីហា ឆ្នាំ២០០៩ វេលាម៉ោង
១០ គេបានឃើញកម្មករក្រុមហ៊ុនឯកជនមួយក្រុមបាននាំគ្នាឡើងលើក្បាលនាគប្រវត្តិសាស្ត្រ ដើម្បីវាយ
សសរស្តម្ភទាំង៤ ដើម្បីកាត់ក្បាលនាគ ។ នៅម៉ោងប្រហែលជា២រសៀល កម្មករទាំងនេះកំពុងតែនាំគ្នា
យកម៉ូទ័រកាត់ដែកសសរ តែមិនទាន់មានគ្រោះថ្នាក់អ្វីកើតឡើងនោះទេ ។

        សាក្សីរូបនោះបានបញ្ជាក់ថា រហូតដល់ម៉ោង២០និង៣០នាទី ទើបប្រជាពលរដ្ឋទាំងអស់មាន
ការភ្ញាក់ផ្អើល ដោយសារតែការស្ទូចយករូបសំណាកក្បាលនាគប្រវត្តិសាស្ត្រ ដោយធ្វេសប្រហែស ខ្វះការ
ប្រុងប្រយ័ត្ន និងទទួលខុសត្រូវ បានធ្វើឲ្យអន្តរាយ ស្ទើរតែទាំងស្រុង ។ ប្រជាពលរដ្ឋមានការសោកស្តាយ
យ៉ាងខ្លាំង ហើយពួកគាត់ទម្លាក់កំហុសថា ទង្វើនេះក្រុមហ៊ុនត្រូវទទួលខុសត្រូវ ពីព្រោះក្រុមហ៊ុនបានម៉ៅ
ការផ្តាច់មុខយ៉ាងច្បាស់លាស់ជាមួយសាលាក្រុងភ្នំពេញ ។

        ផ្អែកតាមការបំភ្លឺពីប៉ូលិសចរាចរនៅកន្លែងកើតហេតុ បាននិយាយថា រឿងបំផ្លិចបំផ្លាញខាងលើ
គេគ្មានជំនឿទេថា សាលាក្រុង ហ៊ានចាត់ការលើក្រុមហ៊ុនដែលបានបំផ្លាញសម្បត្តិបេតិកភណ្ឌនោះឡើយ
។ ការអះអាងបែបនេះព្រោះគេយល់ថា ក្រុមហ៊ុនណាមួយដែលអាចរកស៊ីជាមួយសាលាក្រុងបាន ទាល់
តែខ្សែស្រឡាយ ឬក៏បក្ខពួកគេដែលអាចមានសិទ្ធិធ្វើកិច្ចការអស់ទាំងនេះបាន ។ មិនទាន់មានប្រតិកម្មណា
មួយពីសាលារាជធានីនៅឡើយ នៅព្រឹកថ្ងៃទី២៨ ខែសីហានេះ ៕