ប្រទេសកម្ពុជា ដាក់ជាបេក្ខភាពសមាជិកគណៈកម្មាធិការបេតិកភណ្ឌពិភពលោក(យូណេស្កូ) បន្ទាប់ពី
ប្រទេស​កម្ពុជាខកខានធ្វើជាសមាជិក នៃអង្គការនេះអស់រាប់សិបឆ្នាំមកហើយនោះ ដោយសារតែសង្គ្រាម ។

    លោកឧបនាយករដ្ឋមន្ត្រី​សុខ អាន រដ្ឋមន្ត្រីទទួលបន្ទុក​ទីស្តីការគណៈរដ្ឋមន្ត្រីដឹកនាំគណៈប្រតិភូ
រាជរដ្ឋាភិបាល​កម្ពុជាមានសមាជិក៩នាក់ទៅចូលរួម​មហាសន្និបាតអង្គការយូណេស្កូ ប្រទេសបារាំងកាលពី
ល្ងាចម៉ោង៦និង៣០នាទី ថ្ងៃទី៨ ខែតុលា ឆ្នាំ២០០៩ ។

    លោកឧបនាយករដ្ឋមន្ត្រី​សុខ អាន បានធ្វើសន្និសីទ​សារព័ត៌មាននៅព្រលានយន្តហោះអន្តរជាតិភ្នំពេញ
នៅល្ងាចថ្ងៃទី៨ ខែតុលាថា ក្នុងនាមលោកឧបនាយករដ្ឋមន្ត្រីជាប្រធានគណៈកម្មាធិការជាតិយូណេស្កូ
កម្ពុជាដឹកនាំគណៈ​ប្រតិភូទៅចូលរួមក្នុងមហាសន្និបាតលើកទី៣៥ នៃអង្គការយូណេស្កូ នៅទីក្រុងប៉ារីស
ប្រទេសបារាំង ។ ទន្ទឹមមហាសន្និ​បាតទូទៅក៏មានការរៀបចំបោះឆ្នោត​ជ្រើសរើសសមាជិកនៃគណៈ
កម្មាធិការបេតិកភណ្ឌពិភពលោក​ដែលមាន​សមាជិកចំនួន២១ប្រទេស ដែលជារដ្ឋភាគី​នៃអនុសញ្ញា​អន្តរជាតិ
ស្តីពីកិច្ចការពារអភិវឌ្ឍន៍បេតិកភណ្ឌពិភពលោក គឺ​មានចំនួន​១៨៦ប្រទេស ។

    លោកឧបនាយករដ្ឋមន្ត្រី​សុខ អាន មានប្រសាសន៍បញ្ជាក់បន្តទៀតថា នៅក្នុងចំណោម១៨៦ប្រទេស
គឺត្រូវការជ្រើសរើស២១ប្រទេសធ្វើជាសមាជិកគណៈកម្មាធិការអចិន្ត្រៃយ៍នៃអង្គការ​បេតិកភណ្ឌ
ពិភពលោក ។ នៅឆ្នាំ​២០០៩នេះដែរ ប្រទេសចំនួន១២ត្រូវចប់អាណត្តិ​ចេញពីសមាជិកគណៈកម្មាធិការ
អចិន្ត្រៃយ៍ អ៊ីចឹងត្រូវជ្រើសរើស​ប្រទេសចំនួន១២ថ្មីទៀត បំពេញជាសមាជិកទាំង២១ នៃគណៈកម្មាធិការ
អចិន្ត្រៃយ៍វិញ ។

    លោកឧបនាយករដ្ឋមន្ត្រីសុខ អាន មានប្រសាសន៍បញ្ជាក់ថា នៅឆ្នាំ២០០៩នេះ មានប្រទេសចំនួន២៩
ចុះ​ឈ្មោះជាបេក្ខភាពក្នុងការជ្រើសរើសជាសមាជិកចំនួន១២បន្ថែមឲ្យគ្រប់ចំនួន២១ប្រទេស ហើយការ
ជ្រើសរើស​សមាជិក១២ប្រទេស គឺត្រូវធ្វើតាមរយៈការបោះឆ្នោត ដែលនឹងប្រព្រឹត្តនៅទីស្នាក់ការអង្គការ
យូណេស្កូនាទីក្រុងប៉ារីស ហើយការបោះឆ្នោត នឹងប្រព្រឹត្តទៅនៅថ្ងៃទី២៥ ខែតុលា ឆ្នាំ២០០៩ ។

    លោកឧបនាយករដ្ឋមន្ត្រី សុខ អាន មានប្រសាសន៍បញ្ជាក់ទៀតថា នៅថ្ងៃទី១០ ខែតុលា ឆ្នាំ២០០៩នេះ
រូបលោកត្រូវឡើងថ្លែងសុន្ទរកថា ក្នុងមហាសន្និបាតយូណេស្កូ ។

    លោកឧបនាយករដ្ឋមន្ត្រីសុខ អាន មានប្រសាសន៍បញ្ជាក់ថា កាលពីខែមីនា ឆ្នាំ២០០៩ កម្ពុជាបាន
ធ្វើសេចក្តី​ថ្លែងការ​ដាក់បេក្ខភាពប្រទេសកម្ពុជា ជាបេក្ខជនដើម្បីចូលជាសមាជិកគណៈកម្មាធិការបេតិកភណ្ឌ
ពិភពលោក ។

    ប្រទេសកម្ពុជាចូលជាសមាជិកបេតិកភណ្ឌពិភពលោក កាលពីឆ្នាំ១៩៥១ ប៉ុន្តែតាំងពីនោះ​មក​ប្រទេស
កម្ពុជាមិនបានចូលជាសមាជិកគណៈកម្មាធិការ​បេតិកភណ្ឌពិភពលោកបន្តទៀតទេ អ៊ីចឹងលើកនេះ គឺជា
​លើក​ដំបូង ដែលព្រះរាជាណាចក្រកម្ពុជាដាក់បេក្ខភាពជាផ្លូវការកាលពីខែមីនា ឆ្នាំ២០០៩ ចាប់តាំងពីពេល
នោះមក​កម្ពុជាបានទទួលការបញ្ជាក់ជាបន្តបន្ទាប់​ពីបណ្តាប្រទេសជាមិត្ត បានយល់ថា ប្រទេសកម្ពុជា
ស័ក្តិសមចូលជា​សមាជិកគណៈកម្មាធិការបេតិកភណ្ឌពិភពលោក គឺមានប្រទេសចំនួនជាង៨០មកហើយ
បានផ្តល់ចម្លើយ​វិជ្ជមាន ដើម្បីគាំទ្រកម្ពុជាជាបេក្ខភាព​ចូលក្នុងសមាជិកគណៈកម្មាធិការ​បេតិកភណ្ឌ
ពិភពលោក ហើយនៅថ្ងៃទី២៥ ខែតុលា ឆ្នាំ២០០៩ ប្រទេសជា៨០នោះនឹងបោះឆ្នោតគាំទ្រកម្ពុជា ដើម្បី
ចូលជាសមាជិកគណៈកម្មាធិការបេតិកភណ្ឌ​ពិភពលោក ក្នុងចំណោម២៩ប្រទេសត្រូវរើសយកចំនួន១២
ប្រទេស ហើយក្នុងក្រុមជាមួយកម្ពុជា មាន៥ប្រទេស​ដែល​ត្រូវជ្រើសរើស២ប្រទេសតាមរយៈការបោះឆ្នោត
​ ហើយ៣ប្រទេសទៀតត្រូវធ្លាក់ឆ្នោត ។

    លោកឧបនាយករដ្ឋមន្ត្រីសុខ អាន មានប្រសាសន៍បញ្ជាក់ទៀតថា កម្ពុជាមានសុទិដ្ឋិនិយមជឿជាក់ថា
នឹងជាប់ឆ្នោតជាសមាជិកគណៈកម្មាធិការបេតិកភណ្ឌពិភពលោក(យូណេស្កូ) ពីព្រោះកម្ពុជាបានបញ្ជាក់
ប្រទេសមិត្ត​ថា តាមតាំងពីឆ្នាំ១៩៥១មក​ កម្ពុជាខកខានធ្វើជាសមាជិកអង្គការយូណេស្កូ ហើយប្រទេសខ្លះ
ចូលជាសមាជិកគណៈ​កម្មាធិការបេតិកភណ្ឌពិភពលោកចំនួនពីរលើកមកហើយ ឯកម្ពុជាពុំទាន់​បានចូលទេ
ទើបកម្ពុជាមានការគាំទ្រពី​បណ្តា​ប្រទេស​ជាមិត្ត​ជាង៨០ប្រទេស ។ ចំណុចសំខាន់ជាងនេះទៀត កម្ពុជាត្រូវ
បានគេទទួលស្គាល់ថា មានកេរដំណែល​របស់​បុព្វបុរសមានវប្បធម៌សម្បូរបែបស៊ីជម្រៅ គឺតាមរយៈ
វប្បធម៌អង្គរ ដោយបន្សល់​ទុកនូវបេតិកភណ្ឌពិភពលោកច្រើន​ណាស់ មានប្រាសាទរាប់ពាន់ ទួលបុរាណ
រាប់រយ ស្ពានបុរាណរាប់សិប មានបេតិកភណ្ឌអរូបី សិល្បៈ គ្រប់បែបយ៉ាង កម្ពុជាទទួលបានអភិរក្ស
វប្បធម៌បុរាណបានយ៉ាងជោគជ័យ ដោយសហការជាមួយអន្តរជាតិ ។

    លោកទិត សុធា ទីប្រឹក្សារាជរដ្ឋាភិបាលនិងជាសមាជិកក្រុមអ្នកនាំពាក្យព័ត៌មានប្រតិកម្មរហ័សនៃ
ទីស្តីការ​គណៈរដ្ឋមន្ត្រី បានមានប្រសាសន៍បញ្ជាក់ថា គណៈប្រតិភូទៅចូលរួមប្រជុំមហាសន្និបាតយូណេស្កូ
មាន៩នាក់ ដឹកនាំ​ដោយលោកឧបនាយករដ្ឋមន្ត្រី សុខ អាន លោកជុច ភឿន រដ្ឋលេខាធិការក្រសួងវប្បធម៌
លោកចាន់ តានី រដ្ឋលេខាធិ​ការទីស្តីការគណៈរដ្ឋមន្ត្រី លោក កឹម រដ្ឋពិសិដ្ឋ ទីប្រឹក្សា និងជានាយក
ខុទ្ទកាល័យឧបនាយករដ្ឋមន្ត្រីសុខ អាន លោក ស៊ុំ ម៉ាប់ ទីប្រឹក្សា​ឧបនាយករដ្ឋមន្ត្រីសុខ អាន លោកសន
សោភណ្ឌ សមាជិកបម្រុងរបស់ក្រុមប្រឹក្សា​អ្នកច្បាប់ លោក សុខ សូកាន នាយករងខុទ្ទកាល័យគណៈរដ្ឋ
មន្ត្រី ៕