នៅក្នុងរបាយការណ៍ចុងក្រោយបង្ហាញពីស្ថានភាពទីផ្សារអចលនទ្រព្យទីក្រុងភ្នំពេញ បានធ្វើឲ្យវិនិយោគិន និងរួមទាំងអ្នកដែលបានសម្លឹងឃើញផលចំណេញក្នុង ពេលអនាគតដ៏ខ្លីខាងមុខនោះ មានការព្រួយបារម្ភ។

របាយការណ៍ពីក្រុមប្រឹក្សាអចលនទ្រព្យពាណិជ្ជកម្ម និងលំនៅឋាន Knight Frank បានលើកនូវប្រសាសន៍បែបអវិជ្ជមានអំពីសំណង់លំនៅឋាននៅក្នុងទីក្រុងនេះ ដោយសង្កត់ថា ប្រសិនបើគម្រោងលំនៅឋានដែលបានទទួលការឃ្លាំមើលត្រូវបានបញ្ចប់ការសាងសង់ជាស្ថាពរតាមពេលកំណត់នោះ «វិស័យខុនដូ ត្រូវបាន គេព្យាករថា នឹងកើនឡើងរហូតដល់ ៧២៣,៥០ភាគរយ» នៅត្រឹម ឆ្នាំ២០២០។

Loading...

នៅលើវិស័យនេះតែម្នាក់ឯង វាអាចនឹងមិនមែនជាបញ្ហាទេ តែនៅក្នុងទីផ្សារទូទៅមានខុនដូចំនួនប្រមាណ ៣០០០០ មិនមែនជាតួលេខដ៏ធំសម្បើមនោះទេ សម្រាប់ទីក្រុងដែលមានប្រជាជន ២លាននាក់រស់នៅ។

ទោះជាយ៉ាងនេះក្តី Knight Frank បានលើកឡើងថា ៖ «គេសង្កេតឃើញមានការធ្លាក់ចុះតម្លៃដ៏គួរឲ្យកត់សម្គាល់ចំនួន ៣៥,៨០ ភាគរយ» ជាមួយនឹងការបន្ទាបតម្លៃទៅត្រឹមតែ១៨២៣ដុល្លារក្នុងមួយម៉ែត្រការ៉េ ក្នុងត្រីមាសទី២ឆ្នាំ២០១៦នេះ ពីតម្លៃ២៨៤៣ដុល្លារក្នុងត្រីមាសទី១ ឆ្នាំដដែលនេះ។

Knight Frank ក៏បានទទួលស្គាល់ថា ៖ «នឹងមានចំនួនលើសតម្រូវការក្នុងវិស័យលំនៅឋាន» នៅក្នុងទីក្រុងភ្នំពេញនេះ។

វិស័យអាផាតមិនសម្រាប់ជួលក៏កំពុងតែរងសម្ពាធផងដែរ ជាមួយនឹងការធ្លាក់តម្លៃជួលចំនួន ៧,២០ភាគរយ «ដោយសារតែការប្រកួតប្រជែងមានកំណើន ពីចំនួនអាផាតមិនសម្រាប់ជួល និងអគារខុនដូ ដែលបានសាងសង់រួចរាល់»។

បើតាមការលើកឡើងរបស់របាយការណ៍នេះបង្ហាញថា ៖«តម្លៃជួលត្រូវបានគេព្យាករថា នឹងបន្តធ្លាក់ចុះច្រើនថែមទៀត នៅពេលគម្រោងជាច្រើនទៀតនឹងត្រូវសាងសង់រួចរាល់ចាប់ពីចុងឆ្នាំ២០១៦ បន្តរហូតដល់ឆ្នាំ២០២០»។

វិស័យផ្សេងទៀតក៏នឹងជួបនូវវិបត្តិសម្ពាធនេះដូចគ្នាដែរនៅថ្ងៃអនាគតនោះ។ របាយការណ៍នេះបានទាយទុកមុនថា ចំនួនការិយាល័យជួលនឹងកើនឡើងចំនួន ៨០ភាគរយ ត្រឹមឆ្នាំ២០២០ ជាមួយនឹងការកើនឡើងនៃទីតាំងការិយាល័យសម្រាប់ជួល ដែលនឹងសាងសង់រួចរាល់ចំនួន ២០៩ភាគរយនៅឆ្នាំនោះដែរ។

ក្តីសុបិនរបស់ទីក្រុងភ្នំពេញ នៅក្នុងការក្លាយជាបណ្តុំស្លាកយីហោល្បីៗនោះ ហាក់បីដូចជាបានរលាយទៅវិញនៅពេលថ្មីៗនេះ ដោយសារផ្សារទំនើបលក់អីវ៉ាន់មានចំនួនតិច ហើយចំនួនអ្នកលក់ទំនិញខ្នាតតូចៗមានការកើនឡើង។ ដូចដែល Knight Frank បានលើកឡើងថា ៖ «ចំនួនអ្នកជួលបន្តបានធ្លាក់ចុះយឺតៗ ជាបណ្តើរៗ ហើយតម្រូវការផលិតផលមានស្លាកយីហោល្បីៗបានធ្លាក់ចុះ ដោយសារតម្រូវការផលិតផល ដែលមានតម្លៃទាបជាងមាន ការកើនឡើង»។

វិស័យសណ្ឋាគារនៅក្នុងទីក្រុងនេះក៏ហាក់បីដូចជាកំពុងជួបនឹងបញ្ហាផងដែរ។ Knight Frank ថ្លែងថា នៅត្រឹមឆ្នាំ២០២០ ចំនួនបន្ទប់សណ្ឋាគារនឹងមានការកើនឡើង៤០,៥០ភាគរយ។ បូករួមនឹងការប្រកួតប្រជែងជាមួយវិស័យសណ្ឋាគារប៊ូទិក ប៉ុន្តែការស្នាក់នៅសណ្ឋាគារផ្កាយ៥ ហាក់បីស្ថិតនៅចំនួន ៥០ភាគរយដដែលដូចធម្មតា។

នេះ បើយើងបូករួមជាមួយនឹងកំណើនភ្ញៀវទេសចរចំនួន ៦,១០ភាគរយ កាលពីឆ្នាំមុននោះគឺមានន័យថា នៅពេលអនាគតខាងមុខនេះ ចំនួនបន្ទប់នឹងមានការកើនឡើងហួសពីតម្រូវការ។

លោក Ross Wheble ជានាយកប្រចាំប្រទេសកម្ពុជា របស់ Knight Frank ហាក់ដូចជាមានក្តីសង្ឃឹមចំពោះវិស័យអចលនទ្រព្យនៅទីក្រុងភ្នំពេញ។ «វាច្បាស់ណាស់ថា នឹងមានភាពល្អប្រសើរមួយពិសេសនៅពេលអ្នកធ្វើការ ប្រៀបធៀបតម្លៃជួលនៃវិស័យទាំងអស់នៅក្នុងទីក្រុងភ្នំពេញជាមួយបណ្តាទីក្រុងធំៗ ដូចជាទីក្រុងកូឡាឡាំពួ និងក្រុងបាងកកជាដើម»។

«ទោះបីជាយ៉ាងណាក៏ដោយ សេដ្ឋកិច្ចកម្ពុជាត្រូវបានកត់សម្គាល់ឃើញមានសន្ទុះកើនឡើងយ៉ាងគំហុកកាលពីទសវត្សរ៍កន្លងទៅ នេះជាមួយនឹងការអនុវត្តនូវគោលការណ៍ម៉ាក្រូសេដ្ឋកិច្ចយ៉ាងហ្មត់ចត់ ការព្យាករនេះនឹងបន្តទៅមុខរយៈពេលប៉ុន្មានឆ្នាំតទៅទៀត។

«យើងសុំឲ្យវិនិយោគិននានាមានទស្សនវិស័យសម្រាប់រយៈពេលយូរអង្វែង ជាជាងការប៉ាន់ស្មានរយៈពេលខ្លី»។

លោក Wheble កត់សម្គាល់ឃើញថា នៅក្នុងរយៈពេល ៣ឆ្នាំចុងក្រោយនេះ វិស័យអចលនទ្រព្យទាំងមូលបានផ្លាស់ប្តូរយ៉ាងខ្លាំង ហើយវិនិយោគិនអចលនទ្រព្យជាច្រើនទើបតែមើលឃើញពីការផ្លាស់ប្តូរនេះ។

«ចាប់ពីពេលនេះតទៅ វិនិយោគិនមិនអាចគ្រាន់តែបញ្ចប់គម្រោង រួចអង្គុយចាំយកតម្លៃជួលខ្ពស់នោះទេ។ តម្រូវការពីវិនិយោគិនបរទេសបានធ្លាក់ចុះក្នុងរយៈពេល ៦ខែចុងក្រោយនេះ ដូច្នេះម្ចាស់គម្រោងត្រូវតែមានភាពច្នៃប្រឌិតកាន់តែខ្លាំងលើគុណភាពផលិតផល ដែលខ្លួនដាក់នៅលើទីផ្សារ ទន្ទឹមនឹងកំណើននៃការប្រកួតប្រជែងតម្លៃបែបនេះកាន់តែច្រើនជាងមុន»។

លោក Wheble ក៏មានជំនឿជឿជាក់ថា ម្ចាស់គម្រោងក៏កំពុងតែសម្លឹងមើលទីតាំងផ្សេងក្រៅពីទីក្រុងភ្នំពេញ ដែលស័ក្តិសមសម្រាប់ការវិនិយោគ។ «ទន្ទឹមនឹងការព្រួយបារម្ភអំពីកំណើនហួសតម្រូវការក្នុងវិស័យអចលនទ្រព្យនៅទីក្រុងភ្នំពេញ។ ខេត្តផ្សេងៗទៀត ក៏កំពុងតែទាក់ទាញវិនិយោគិនគួរឲ្យកត់សម្គាល់ ដូចជាខេត្តព្រះសីហនុ និងកោះរ៉ុង ហើយយើងរំពឹងថា នឹងឃើញមានការផ្លាស់ប្តូរទិសដៅទីតាំងសម្រាប់ការវិនិយោគពីទីក្រុងភ្នំពេញ ទៅតំបន់ផ្សេងៗទៀតនៅកម្ពុជា។

បើយោងតាមសម្តីរបស់លោក Stephen Higgins ដែលជាដៃគូគ្រប់គ្រងរបស់ក្រុមហ៊ុនវិនិយោគ Mekong Strategic Partners បានថ្លែងថា ផ្នែកមួយចំនួននៃទីផ្សារអចលនទ្រព្យនៅទីក្រុងភ្នំពេញ មានការកើនឡើងល្អប្រសើរជាងផ្នែកផ្សេងទៀត។

«ផ្នែកទីផ្សារមួយដែលកំពុងតែកើនឡើងលើសលប់នៅពេលបច្ចុប្បន្ននេះ គឺទីផ្សារខុនដូ វាពុំមែនទីផ្សារអចលនទ្រព្យទាំងមូលនៅក្រុងភ្នំពេញនោះទេ» នេះបើតាមសម្តីរបស់លោក។

លោកបន្តថា ៖ «ប៉ុន្តែបើសិនជាមានកំណើននៅក្នុងវិស័យខុនដូ នេះក្តី ក៏នៅតែមានគម្រោងមួយចំនួន ដែលនឹងទាក់ទាញវិនិយោគិនដែរ ដូចជាគម្រោង Urbanland ជាដើម»។

លោកបន្ថែមថា ៖ «តម្រូវការ គឺនៅតែមានសម្រាប់វិស័យអចលនទ្រព្យឧស្សាហកម្ម ឬពាណិជ្ជកម្មនៅក្រុងភ្នំពេញ ហើយវានឹងផ្តល់ឱកាសល្អៗជាច្រើនសម្រាប់វិនិយោគិន»។

ស្របគ្នានេះដែរ លោក Higgins បានបង្ហាញការព្យាករណ៍របស់ Knight Frank អំពីកំណើនហួសតម្រូវការនេះ អាចនឹងកំពុងតែកើតឡើងចំពោះមុខយើងរួចបាត់ទៅហើយ។

លោកថ្លែងទៀតថា ៖ «នៅពេលយើងមើលទៅកាន់តែចំនួនដែលនឹងសាងសង់រួចរាល់ វាពិបាកនឹងស្មានណាស់ ថាតើរយៈពេល ៥ឆ្នាំទៅមុខទៀត វានឹងទៅជាយ៉ាងណា?»។

វាមិនផ្អែកតែលើទិន្នន័យកាលពីមុនទេ លោក Wheble បានប្រាប់ភ្នំពេញប៉ុស្តិ៍អចលនទ្រព្យថា គម្រោងដែលបានចាប់ផ្តើមសាងសង់ហើយរហូតដល់៤០ភាគរយក្នុងមួយឆ្នាំអាចនឹងអូសបន្លាយទៅដល់ឆ្នាំក្រោយៗទៀតទម្រាំសង់រួចរាល់ គឺវាបណ្តាលមក ពីការពន្យារការសាងសង់៕

ប្រភព៖ ភ្នំពេញប៉ុស្តិ៍