ធនាគារ​ឲ្យ​ដឹងថា ហេតុការណ៍​កើតឡើង​ចំពោះ​អតិថិជន​ត្រូវបាន​ដោះស្រាយ តែ​បុរស​រូបនោះ នៅតែ​ចចេស ជួល​នារី​រាំ​ស្រាត​២​នាក់ មកកាន់​សាខា​ធនាគារ​របស់ខ្លួន ។​

​តាម​នោះ បុរស​សញ្ជាតិ​រុស្ស៊ី​ម្នាក់ ដែល​ពុំទាន់​កំណត់​អត្តសញ្ញាណ​បាន ស្រាប់តែ​បង្ហាញ​វត្ត​មាននៅ​សាខា​ធនាគារ Sberbank – ធនាគារ​ធំ​បំផុត​នៅ​រុស្ស៊ី ដោយ​នាំ​តាម​ជាមួយ​នារី​រាំ​ស្រាត​២​នាក់ ។ បុរស​រូបនេះ និយាយថា ធនាគារ Sberbank ប្រាស្រ័យ​ទាក់ទង​នឹង​អតិថិជន​គ្មាន​ភាព «​រាក់ទាក់​» ។​

​បន្ទាប់មក បុរស​រូបនេះ​និយាយថា «​នឹង​ឲ្យ​លោក លោកស្រី ដឹង​ពី​របៀប​រាក់ទាក់​ជាមួយ​អតិថិជន​បែបណា​ទើបត្រូវ ។ ភ្លេង​ក៏​លានឮ​ភ្លាម ហើយ​នារី​រាំ​ស្រាត​២​នាក់​នោះ ក៏​ជម្រុះ​ខោអាវ​….​ទាល់តែ​អស់​» ។​

​អតិថិជន​រូបនេះ បន្ត​ស្រែកថា ធនាគារ​បានធ្វើ​ឲ្យ​ខ្លួន «​មួម៉ៅ​» ហើយ «​សង្ឃឹមថា លោក លោកស្រី និង​ចងចាំ ខណៈពេល​នេះ​» ។​

​នាយក​ឃោសនា​ពាណិជ្ជកម្ម​របស់​ធនាគា​រ Sberbank Oley Vlasov បញ្ជាក់ថា ហេតុការណ៍​នេះ​បានកើត​ឡើង​នៅ​សាខា​មួយ​របស់ Sberbank នា​ក្រុង​មូ​ស្គូ អំឡុង​ខែឧសភា ហើយ​ធនាគារ​ក៏បាន​សម្រួល​បញ្ចប់រឿង មុនពេល​បុរស​នេះ​នៅ​ពុំ​សុខចិត្ត ហើយ «​សងសឹក​» តាមបែប​ខាងលើ ។​

​ធនាគារ​ក៏បាន​រាយការណ៍​ទៅ​ប៉ូលីស ៕​